પલસાણાના જોળવા ગામમાં ૨૩ વર્ષીય યુવકનો શંકાસ્પદ હાલતમાં મૃતદેહ મળ્યો

સુરત જિલ્લાના પલસાણા તાલુકાના જોળવા ગામમાં આવેલી આરાધના ગ્રીનલેન્ડ સોસાયટીમાં ૨૩ વર્ષીય યુવક તેજસ રાજેન્દ્રભાઈ પાટીલનું શંકાસ્પદ સંજોગોમાં મોત થયું છે. આ ઘટનાને પગલે સ્થાનિક પોલીસ દ્વારા તપાસ હાથ ધરવામાં આવી છે.

મળતી માહિતી અનુસાર, મૃતક તેજસ પોતાના રહેણાંક મકાનના રૂમમાં પંખાના હુક સાથે સાડી બાંધી ગળેફાંસો ખાધેલી હાલતમાં મળી આવ્યો હતો. આ દ્રશ્ય જોઇને સૌ કોઈ ચોંકી ઉઠ્યા હતા.

આ ઘટના અંગે પરિવારજનો દ્વારા પોલીસને જાણ કરવામાં આવી હતી. પોલીસે ઘટનાસ્થળે પહોંચી મૃતદેહનો કબજો લઈ પોસ્ટમોર્ટમ માટે ખસેડ્યો છે. પોલીસે આ મામલે વધુ તપાસ હાથ ધરી છે અને મૃત્યુના સાચા કારણો જાણવાનો પ્રયાસ કરી રહી છે.