અમદાવાદ: કરોડપતિઓના ઘરે નોકરી કરી લાખોની ચોરી કરનાર આરોપી ઝડપાયો

અમદાવાદ ક્રાઈમ બ્રાન્ચે શાહીબાગ વિસ્તારમાં ₹35 લાખથી વધુની ચોરીના એક મોટા કેસમાં જયંતીલાલ ઉર્ફે વિનોદ ખેતમલ જૈન નામના આરોપીને ઝડપી પાડ્યો છે. પોલીસના જણાવ્યા અનુસાર, આરોપી કરોડપતિઓના ઘરે નોકર તરીકે નોકરી મેળવી તેમનો વિશ્વાસ જીતતો હતો અને ત્યારબાદ ગણતરીના કલાકોમાં જ લાખો રૂપિયાની ચોરી કરીને ફરાર થઈ જતો હતો.

પ્રાથમિક તપાસમાં સામે આવ્યું છે કે, આ આરોપી અગાઉ પણ આવી 7 મોટી ચોરીઓમાં સંડોવાયેલો હતો. ચોરીના પૈસાનો ઉપયોગ તે મંદિરોમાં દાન કરવા માટે કરતો હોવાનું પણ પોલીસ તપાસમાં બહાર આવ્યું છે. આ ગુનાહિત પ્રવૃત્તિઓ દ્વારા તેણે મોટી સંપત્તિ એકઠી કરી હતી.

ક્રાઈમ બ્રાન્ચે આરોપી પાસેથી ₹35.06 લાખની રોકડ અને અન્ય મુદ્દામાલ કબજે કર્યો છે. આ મામલે વધુ તપાસ હાથ ધરવામાં આવી રહી છે અને આરોપીના અન્ય સાગરિતો છે કે કેમ તે દિશામાં પણ પોલીસે તપાસ શરૂ કરી છે.