અમદાવાદ: સોના-ચાંદીના દાગીના બનાવી આપવાના નામે લાખોની છેતરપિંડી કરનાર પિતા-પુત્ર ક્રાઈમ બ્રાન્ચની ઝપેટમાં

અમદાવાદ શહેરમાં સોના-ચાંદીના દાગીના બનાવી આપવાના નામે મોટી છેતરપિંડી આચરનાર પિતા-પુત્રની ક્રાઈમ બ્રાન્ચે ધરપકડ કરી છે. આરોપીઓએ ફરિયાદી અને અન્ય વ્યક્તિઓને ફાયદો કરાવી આપવાની લાલચ આપી સોનું, ચાંદી અને રોકડ રકમ મેળવી લીધી હતી. આ છેતરપિંડી દ્વારા કુલ રૂ. 27.68 લાખની રકમ પડાવી લેવામાં આવી હતી.

પ્રાપ્ત માહિતી અનુસાર, આરોપીઓ ચાંદીના વાસણો બનાવી આપવાના બહાને પણ ઠગાઈ કરતા હતા. જ્યારે ફરિયાદીને તેમના સોના-ચાંદીના દાગીના બનાવીને આપવામાં આવ્યા નહીં, ત્યારે તેમણે પોલીસ ફરિયાદ નોંધાવી હતી. આ ફરિયાદના આધારે ક્રાઈમ બ્રાન્ચે તપાસ હાથ ધરી હતી.

ક્રાઈમ બ્રાન્ચે ઉમેશ ચેલાણી અને નારાયણદાસ ચેલાણી નામના પિતા-પુત્રની ધરપકડ કરી છે. તેમની પાસેથી સોના-ચાંદીના દાગીના સહિત રૂ. 9,08,945 નો મુદ્દામાલ કબજે કરવામાં આવ્યો છે. સમગ્ર મામલે ક્રાઈમ બ્રાન્ચે વધુ તપાસ હાથ ધરી છે અને અન્ય કોઈ ભોગ બન્યા છે કે કેમ તે દિશામાં પણ તપાસ ચાલી રહી છે.