ભરૂચના શાલિમાર શોપિંગ સેન્ટરનો સ્લેબ ધરાશાયી: સદનસીબે જાનહાનિ ટળી

ભરૂચ શહેરના શાલિમાર શોપિંગ સેન્ટરમાં આજે એક દુર્ઘટના બની હતી, જેમાં શોપિંગ સેન્ટરનો એક સ્લેબ અચાનક ધરાશાયી થયો હતો. આ ઘટના સમયે શોપિંગ સેન્ટરની બાજુમાં આવેલા સ્માર્ટ બજારમાં લોકોની ભારે અવર-જવર હતી, જેના કારણે લોકોમાં ગભરાટ ફેલાયો હતો. જોકે, સદનસીબે આ દુર્ઘટનામાં કોઈ પણ વ્યક્તિને ઈજા પહોંચી નથી અને જાનહાનિ ટળી છે.

પ્રત્યક્ષદર્શીઓના જણાવ્યા અનુસાર, સ્લેબ ધરાશાયી થતાં લોકોના જીવ પડીકે બંધાયા હતા. આ ઘટનાએ ફરી એકવાર શહેરની માળખાકીય સુવિધાઓની સુરક્ષા સામે પ્રશ્નાર્થ સર્જ્યો છે.

પ્રાપ્ત માહિતી અનુસાર, આ સ્લેબ ઘણા સમયથી જર્જરિત હાલતમાં હતો. તેમ છતાં, સ્થાનિક તંત્ર દ્વારા આ બાબતે કોઈ નક્કર પગલાં લેવામાં આવ્યા ન હોવાની ચર્ચાએ જોર પકડ્યું છે. લોકોમાં એવી પણ ચર્ચા છે કે તંત્રની બેદરકારીને કારણે આ દુર્ઘટના બની શકે છે.