અમરેલી: યુવક પર ડોક પકડી માર માર્યા બાદ જાનથી મારી નાખવાની ધમકી

અમરેલી શહેરમાં એક યુવક પર હુમલો કરી ડોક પકડી જાનથી મારી નાખવાની ધમકી આપવાનો ગંભીર બનાવ બન્યો છે. આ ઘટના અંગે રવિભાઈ રાજાભાઈ ગૌતમે અમિત યાદવ અને તેની સાથે રહેલા બે અજાણ્યા ઈસમો વિરુદ્ધ ફરિયાદ નોંધાવી છે. આ ફરિયાદના આધારે પોલીસે ગુનો નોંધી કાયદેસરની કાર્યવાહી હાથ ધરી છે.

પ્રાપ્ત માહિતી અનુસાર, ફરિયાદી દવા લઈને પરત ફરી રહ્યા હતા તે દરમિયાન અમિત યાદવના પિતા તેમના વતનમાં હતા ત્યારે તેમનું ટ્રેક્ટર સળગાવી દેવામાં આવ્યું હતું. આ બનાવને કારણે બંને પરિવારો વચ્ચે બોલાચાલી થઈ હતી. આ ઘટનાનું મનદુઃખ રાખીને અમિત યાદવે ફરિયાદીનો પીછો કરી તેમની ડોક પકડી લીધી હતી અને માર મારવાનું શરૂ કર્યું હતું.

હુમલાખોરોએ ફરિયાદીને શરીરે આડેધડ ઢીકાપાટુનો માર માર્યો હતો. એટલું જ નહીં, જેમ ફાવે તેમ ગાળો આપી જાનથી મારી નાખવાની ધમકી પણ આપવામાં આવી હતી. આ ગંભીર બનાવ બાદ ફરિયાદીએ તાત્કાલિક પોલીસનો સંપર્ક કર્યો હતો અને ફરિયાદ નોંધાવી હતી.

આ સમગ્ર મામલે અમરેલી એસ.સી. એસ.ટી. સેલના નાયબ પોલીસ અધિક્ષક પી. આર. રાઠોડ વધુ તપાસ કરી રહ્યા છે. તેઓ ઘટના સ્થળની મુલાકાત લઈને પુરાવા એકત્રિત કરવાની સાથે સાથે આરોપીઓને ઝડપી પાડવાના પ્રયાસો કરી રહ્યા છે.