ધારી નજીક વિરપુર ગામે શિકાર કરવા જતાં સિંહણ ખુલ્લા કૂવામાં ખાબકી, વન વિભાગે સુરક્ષિત રીતે બહાર કાઢી

ધારી તાલુકાના વિરપુર ગામમાં એક અણધાર્યો બનાવ બન્યો હતો, જ્યાં શિકારની શોધમાં દોડી રહેલી એક સિંહણ ખુલ્લા કૂવામાં ખાબકી હતી. આ ઘટનાની જાણ થતાં જ વન વિભાગ દ્વારા તાત્કાલિક રેસ્ક્યુ કામગીરી હાથ ધરવામાં આવી હતી.

પ્રાપ્ત માહિતી અનુસાર, વિરપુર ગામે ભાભલુભાઈ નાગભાઈ ધાખડાની વાડી નજીક એક ખુલ્લા કૂવા પાસે સિંહણે એક જંગલી સુવરનો શિકાર કરવા માટે દોડ લગાવી હતી. આ દોડ દરમિયાન, સુવરની સાથે સિંહણ પણ અચાનક કૂવામાં પડી ગઈ હતી.

સ્થાનિક લોકો દ્વારા બનાવની જાણ થતાં જ ધારીના દલખાણીયા રેન્જનો સ્ટાફ અને રેસ્ક્યુ ટીમ તાત્કાલિક ઘટના સ્થળે પહોંચી ગઈ હતી. વન વિભાગની કુશળ ટીમે ભારે જહેમત બાદ કૂવામાં પડેલી સિંહણને સુરક્ષિત રીતે બહાર કાઢવામાં સફળતા મેળવી હતી.

સિંહણને બહાર કાઢ્યા બાદ, તેની વધુ તપાસ અને સારવાર માટે ધારી ખાતે આવેલ એનિમલ કેર સેન્ટરમાં ખસેડવામાં આવી છે, જ્યાં તેની દેખરેખ રાખવામાં આવશે.