અમદાવાદના એલિસબ્રિજ પર યુવકે આપઘાતનો પ્રયાસ કર્યો, ફાયર વિભાગની ટીમ દ્વારા સુરક્ષિત બચાવવામાં આવ્યો

અમદાવાદના એલિસબ્રિજ પર ૩ ઓક્ટોબરની મોડી રાત્રે એક યુવકે સાબરમતી નદીમાં કૂદીને આપઘાત કરવાનો પ્રયાસ કર્યો હતો. આ ઘટનાની જાણ થતાં જ પોલીસ અને ફાયર વિભાગની રિવર રેસ્ક્યુ ટીમ તાત્કાલિક ઘટનાસ્થળે પહોંચી હતી.

બચાવ કામગીરી દરમિયાન ફાયર જવાનોએ લગભગ દોઢ કલાક સુધી યુવક સાથે વાત કરી તેને સમજાવ્યો હતો. ત્યારબાદ, ટીમે અત્યંત સાવધાનીપૂર્વક દોરડાની મદદથી યુવકને સુરક્ષિત રીતે નીચે ઉતારી રિવરફ્રન્ટ પર લાવ્યો હતો.

આ સમગ્ર રેસ્ક્યુ ઓપરેશનનો વીડિયો પણ સામે આવ્યો છે, જેમાં ફાયર વિભાગની ટીમની સમયસૂચકતા અને મહેનત જોવા મળે છે.