ધારી નજીક દલખાણીયા ગામે મોડી રાત્રે સિંહે ગાયનો શિકાર કર્યો, વીડિયો વાયરલ

ધારી તાલુકાના દલખાણીયા ગામે મોડી રાત્રે સિંહે ગાયનો શિકાર કર્યાની ઘટના સામે આવી છે. આ ઘટનાનો વીડિયો હાલમાં સોશિયલ મીડિયા પર ખૂબ જ ઝડપથી વાયરલ થઈ રહ્યો છે, જેના કારણે સ્થાનિક લોકોમાં ચર્ચાનો વિષય બન્યો છે.

પ્રાપ્ત માહિતી અનુસાર, મોડી રાત્રિના સમયે ગામમાં પ્રવેશેલા એક સિંહે ગાયનો શિકાર કર્યો હતો. આ સમગ્ર ઘટના ગામમાં લાગેલા સીસીટીવી કેમેરામાં કેદ થઈ ગઈ હતી, જે હવે વાયરલ થઈ રહી છે. છેલ્લા કેટલાક સમયથી શિકારની શોધમાં જંગલ વિસ્તારમાંથી સિંહો અવારનવાર ગામ તરફ આવી રહ્યા હોવાના બનાવો બની રહ્યા છે.

ગામની આસપાસ સિંહોની સતત અવરજવર રહેતી હોવાને કારણે ગ્રામજનોમાં ભયનો માહોલ જોવા મળી રહ્યો છે. લોકોને પોતાના પાલતુ પશુઓની સુરક્ષાની ચિંતા સતાવી રહી છે. વન વિભાગ દ્વારા ગ્રામજનોને સતર્ક રહેવા અને રાત્રીના સમયે બિનજરૂરી રીતે બહાર ન નીકળવા માટે અપીલ કરવામાં આવી છે.