କୌନ ବନେଗା କରୋଡ଼ପତି ହଟ ସିଟରେ ମୟୁରଭଞ୍ଜ ଝିଅ

ସୋନାଲି ପେଶାରେ ଡାକ ବିଭାଗରେ ଜିଡ଼ିଏସ ଭାବେ କାର୍ଯ୍ୟ କରନ୍ତି । କେବିସିରେ ଭାଗ ନେବା ପାଇଁ ତାଙ୍କର ପିଲାଟି ଦିନରୁ ସ୍ୱପ୍ନ ଥିଲା । ତେଣୁ ଗତ ଜାନୁଆରୀ ମାସରେ ସେ କେବିସି ପାଇଁ ରେଜିଷ୍ଟ୍ରେସନ କରିଥିଲେ। ମାର୍ଚ୍ଚ ମାସରେ କ୍ୱାଲିଫାଏ ହେବା ସହିତ ଜୁନ ମାସରେ କଲିକତାରେ ଅଡିସନ ଦେଇଥିଲେ। ଆଉ ଅଡିସନରେ ସେ ମନୋନୀତ ହୋଇଥିଲେ । ଏହା ପରେ ଗତ ୧୭ ତାରିଖରେ ସେ କେବିସିର ହଟସିଟରେ ବଲିଉଡ଼ ଅଭିନେତା ଅମିତାଭ ବଚ୍ଚନଙ୍କ ସାମ୍ନାରେ ବସି କେବିସି ଖେଳିଥିଲେ । ସମୁଦାୟ ୧୬ ଗୋଟି ପ୍ରଶ୍ନ କେବିସିରେ ତାଙ୍କୁ ପଚରାଯାଇଥିଲା । ସେ ୧୨ଟି ପ୍ରଶ୍ନର ସଠିକ ଉତ୍ତର ଦେବା ପରେ ନିଜ ଆଡୁ ଆଗକୁ ଯିବାକୁ ମନା କରିଦେଇଥିଲେ। ଆଉ ଏହି ଖେଳରୁ ସେ ୧୨ ଲକ୍ଷ ଟଙ୍କା ଜିତିଥିଲେ ।
ଏହି ଶୋ’ରେ ସୋନାଲିଙ୍କ ସହିତ ତାଙ୍କ ମା’ ରୀନା ଦଳେଇ ଉପସ୍ଥିତ ଥିଲେ। ୩ ଘଣ୍ଟା ଧରି ହୋଇଥିବା ଏହି କେବିସି କାର୍ଯ୍ୟକ୍ରମ ସୁଟିଙ୍ଗରେ ଅମିତାଭ ବଚ୍ଚନ ଅନେକ ଥଟ୍ଟା ମଜ୍ଜା କରିବା ସହିତ ପରିବାରର ସମସ୍ୟା ବାବଦରେ ତାଙ୍କୁ ପଚାରିଥିଲେ । ଝିଅର ଏଭଳି ସଫଳତା ପାଇଁ ଘରୋଇ ଶିକ୍ଷକ ଭାବେ ଶିକ୍ଷାଦାନ କରୁଥିବା ଉଭୟ ମା’ ଏବଂ ବାପାଙ୍କ ଖୁସି କହିଲେ ନ ସରେ।