ટ્રાફિક પોલીસ ચોકી પાસે ટ્રક ચાલકો પાસેથી હપ્તો વસૂલતા પોલીસ કર્મચારી અને દલાલો ઝડપાયા

સુરતમાં ટ્રાફિક પોલીસ ચોકીની નજીક જ ગેરકાયદેસર રીતે હપ્તા વસૂલાતનો પર્દાફાશ થયો છે. પ્રાપ્ત માહિતી અનુસાર, વહેલી સવારે 5 થી 7 વાગ્યાની વચ્ચે રાત્રિના અંધારામાં સરદાર માર્કેટથી સ્ટેશન જતા રસ્તા પર આવેલી ટ્રાફિક પોલીસ ચોકીની આસપાસ 5 થી 6 યુનિફોર્મ વિનાના અને એક યુનિફોર્મમાં પોલીસ કર્મચારી ટ્રક ચાલકો પાસેથી 50, 100, 200 રૂપિયા જેટલી રકમનો હપ્તો વસૂલતા હતા.

આ પ્રકારનો ગેરકાયદેસર ધંધો દર શનિવારે પુનરાવર્તિત થતો હતો. છેલ્લા બે અઠવાડિયાથી આ અંગેની ફરિયાદો મળતી હતી. આ ફરિયાદોના આધારે, એક રેકી ગોઠવવામાં આવી હતી અને આ રાત્રિના અંધારામાં ચાલતા ભ્રષ્ટાચાર અને બેઇમાનીનો પર્દાફાશ કરવામાં આવ્યો.

આ રેડ દરમિયાન, ભ્રષ્ટ કર્મચારીઓ અને તેમના વચેટિયાઓ, એટલે કે દલાલોને ઝડપી પાડવામાં આવ્યા છે. આ કાર્યવાહીથી પોલીસ વિભાગમાં પણ ખળભળાટ મચી ગયો છે. આ મામલે વધુ તપાસ હાથ ધરવામાં આવી રહી છે.