અમદાવાદ-રાજકોટ હાઈવે પર લક્ઝરી બસમાં આગ, ડ્રાઇવરની સમયસૂચકતાથી યાત્રિકોનો ચમત્કારિક બચાવ

અમદાવાદ-રાજકોટ હાઈવે પર આજે એક મોટી દુર્ઘટના થતાં રહી ગઈ. મુસાફરોથી ભરેલી એક લક્ઝરી બસમાં અચાનક આગ લાગી હતી. હાઈવે પર ટ્રાફિકની વચ્ચે બસમાં આગ લાગતાં અફરાતફરીનો માહોલ સર્જાયો હતો. બસમાંથી ધુમાડાના ગોટેગોટા નીકળતા જોઈ મુસાફરોમાં ભય ફેલાયો હતો.

જોકે, બસના ડ્રાઇવરે પરિસ્થિતિની ગંભીરતાને પારખી તાત્કાલિક બસને સલામત સ્થળે રોકી દીધી હતી. ડ્રાઇવરની સમયસૂચકતા અને હિંમતને કારણે બસમાં સવાર તમામ મુસાફરોને આગ ફેલાય તે પહેલાં સુરક્ષિત રીતે નીચે ઉતારી લેવામાં આવ્યા હતા. આ કારણે જાનહાનિ ટળી હતી અને તમામ મુસાફરોનો આબાદ બચાવ થયો હતો.

આ ઘટનાની જાણ થતાં જ પોલીસની 112 PCR વાન સહિતની ટીમ તાત્કાલિક ઘટનાસ્થળે દોડી આવી હતી. ત્યારબાદ ફાયર બ્રિગેડની ટીમને પણ જાણ કરવામાં આવી હતી. ફાયર બ્રિગેડના જવાનોએ તાત્કાલિક આગ પર કાબૂ મેળવવા માટે પ્રયાસો શરૂ કર્યા હતા અને સમયસર આગ પર કાબૂ મેળવી લીધો હતો, જેથી આગ વધુ ફેલાઈ ન હતી.