મતદાર યાદીમાં ગેરરીતિ: ગોપાલ ઇટાલિયાએ ચૂંટણી કમિશનર જ્ઞાનેશ કુમારના રાજીનામાની માંગ કરી

વિસાવદરના ધારાસભ્ય ગોપાલ ઇટાલિયાએ મતદાર યાદીમાં થયેલા મોટા પાયાના ફેરફારો અને કરોડો મતદારોના નામ દૂર થવા મુદ્દે મુખ્ય ચૂંટણી કમિશનર જ્ઞાનેશ કુમાર પર આકરા પ્રહારો કર્યા છે. ઇટાલિયાએ જણાવ્યું હતું કે મતદાર યાદીમાંથી મોટી સંખ્યામાં નામો દૂર થવાથી નાગરિકોના મતાધિકાર પર ગંભીર અસર પડી રહી છે.

ગોપાલ ઇટાલિયાએ જ્ઞાનેશ કુમારના તાત્કાલિક રાજીનામાની માંગ કરી છે અને સમગ્ર ગુજરાતના લોકોને આ મુદ્દે અવાજ ઉઠાવવા માટે આહવાન કર્યું છે. તેમણે જ્ઞાનેશ કુમાર સામે કાયદેસરની તપાસ અને જવાબદારી નક્કી કરવાની પણ માંગ કરી છે.

દરમિયાન, મતદાર યાદીમાં મોટી સંખ્યામાં નામો બહાર રહી જવાના મુદ્દે દેશવ્યાપી ચર્ચા વચ્ચે ચૂંટણી પંચે યોગ્ય મતદારોને ફરી મતદાર યાદીમાં સામેલ કરવા માટે વિશેષ ઝુંબેશ હાથ ધરવાની જાહેરાત કરી છે. નોંધનીય છે કે જ્ઞાનેશ કુમાર વિરુદ્ધ SIR પ્રક્રિયા અને મતદાર નામો અંગે સુપ્રીમ કોર્ટમાં પણ અરજી દાખલ થઈ છે, જેમાં તપાસ અને કાર્યવાહી જેવી માંગણીઓ કરવામાં આવી છે.