ખેડા: જૂની અદાવતમાં ગુતાલ ગામ બન્યું રણમેદાન, બે જૂથો વચ્ચે પથ્થરમારો અને મારામારી

ખેડા જિલ્લાના નડિયાદ તાલુકાના ગુતાલ ગામે જૂની અદાવતને કારણે બે જૂથો વચ્ચે ઉગ્ર બોલાચાલી બાદ ઘર્ષણની ઘટના બની છે. આ ઘટનામાં બંને પક્ષના લોકો લાકડી-દંડા અને પથ્થરો સાથે સામસામે આવી ગયા હતા, જેના કારણે ગામમાં અફડાતફડીનો માહોલ સર્જાયો હતો.

પ્રાપ્ત માહિતી અનુસાર, ગામમાં જૂની અદાવત ચાલી રહી હતી, જે આજે બે જૂથો વચ્ચે બોલાચાલીમાં પરિણમી. પરિસ્થિતિ વણસતા બંને પક્ષોએ હિંસક સ્વરૂપ ધારણ કર્યું હતું. લાકડી-દંડા અને પથ્થરોનો ઉપયોગ થતાં ગામલોકોમાં ભય ફેલાયો હતો.

આ ઘટનાની જાણ થતાં સ્થાનિક પોલીસ ઘટનાસ્થળે પહોંચી હતી અને પરિસ્થિતિને કાબૂમાં લેવાના પ્રયાસો હાથ ધર્યા હતા. હાલમાં પોલીસે બંને પક્ષોની ફરિયાદ નોંધી વધુ તપાસ હાથ ધરી છે. ગામમાં શાંતિ જાળવવા માટે પોલીસ બંદોબસ્ત ગોઠવવામાં આવ્યો છે.