દલાની મુવાડી ગામમાં ખેતરમાં પાણી વાળતી વખતે સાપ કરડતા ખેડૂતનું મોત

પ્રાંતિજ તાલુકાના દલાની મુવાડી ગામ ખાતે એક દુઃખદ ઘટના બની છે. ગામના રહેવાસી ઝાલા વિજયસિંહ જાલમસિંહ (અંદાજે 47 વર્ષ) પોતાના ખેતરમાં પાણી વાળવાનું કામ કરી રહ્યા હતા.

આ દરમિયાન, અચાનક એક સાપે તેમને ડંખ માર્યો હતો. સાપ કરડ્યા બાદ તેમને તાત્કાલિક સારવાર માટે લઈ જવાની તૈયારી કરવામાં આવી હતી, પરંતુ કમનસીબે સારવાર મળે તે પહેલાં જ તેમનું મૃત્યુ થયું હતું.

આ ઘટનાને પગલે સમગ્ર ગામમાં શોકનું મોજું ફરી વળ્યું છે. ખેડૂતના અચાનક અવસાનથી પરિવારજનો અને સ્થાનિકોમાં ભારે દુઃખની લાગણી વ્યાપી છે.