સુરતમાં બાંધકામ ધરાશાયી: પાલનપુર અને ગોપીપુરામાં બે અલગ ઘટનાઓમાં જાનહાનિ ટળી

સુરત શહેરમાં બાંધકામ ધરાશાયી થવાના બે અલગ-અલગ બનાવો સામે આવ્યા છે, જેના કારણે સ્થાનિકોમાં ચિંતાનો માહોલ સર્જાયો હતો. જોકે, સદનસીબે બંને ઘટનાઓમાં કોઈ જાનહાનિ કે ઇજા ન થતાં તંત્ર અને સ્થાનિકોએ રાહતનો શ્વાસ લીધો છે.

પ્રથમ બનાવમાં, પાલનપુર જકાતનાકા વિસ્તારમાં આવેલા એક એપાર્ટમેન્ટના ગ્રાઉન્ડ ફ્લોર પરના ફ્લેટમાં બેડરૂમનો સ્લેબ અચાનક ધડાકાભેર તૂટી પડ્યો હતો. આ ઘટના બનતાં જ ફ્લેટમાં રહેતા લોકોમાં ભયનો માહોલ છવાયો હતો, પરંતુ સદનસીબે કોઈને ઈજા થઈ ન હતી.

બીજા બનાવમાં, શહેરના કોટ વિસ્તાર ગણાતા ગોપીપુરામાં એક જૂના અને જર્જરિત મકાનની દિવાલનો મોટો હિસ્સો રોડ પર ધરાશાયી થયો હતો. આ ઘટના સમયે રોડ પર અવરજવર ચાલુ હોવાથી મોટી દુર્ઘટના સર્જાવાની ભીતિ હતી, પરંતુ સદનસીબે કોઈ પસાર થનાર વ્યક્તિને નુકસાન થયું ન હતું.