કચ્છ: ગઢશીશા પોલીસે દેશી બનાવટની બંદૂક સાથે એક ઈસમને ઝડપી પાડ્યો

પશ્ચિમ કચ્છ-ભુજ એસ.ઓ.જી. (સ્પેશિયલ ઓપરેશન્સ ગ્રુપ) ની ટીમે બાતમીના આધારે ગઢશીશા પોલીસ સ્ટેશન વિસ્તારના નાગ્રેચા ગામ નજીક ચાદાસર તળાવ પાસે ઓગનની બાવળની ઝાડીમાંથી એક ઈસમને દેશી બનાવટની મજલ લોડ બંદૂક સાથે ઝડપી પાડ્યો છે.

આ અંગે પ્રાપ્ત વિગતો મુજબ, એસ.ઓ.જી. ટીમને ચોક્કસ બાતમી મળી હતી કે નાગ્રેચા ગામ નજીક ચાદાસર તળાવ પાસે ઓગનની બાવળની ઝાડીમાં એક ઈસમ ગેરકાયદેસર હથિયાર સાથે છુપાયેલો છે. આ બાતમીના આધારે એસ.ઓ.જી. ટીમે તાત્કાલિક ઘટના સ્થળે પહોંચી તપાસ હાથ ધરી હતી.

પોલીસે સ્થળ પર પહોંચી તપાસ કરતાં એક ઈસમ શંકાસ્પદ રીતે મળી આવ્યો હતો. પોલીસે તેની તલાશી લેતાં તેની પાસેથી દેશી બનાવટની મજલ લોડ બંદૂક મળી આવી હતી. પોલીસે હથિયાર કબજે કરી ઈસમની ધરપકડ કરી કાયદેસરની કાર્યવાહી હાથ ધરી છે. આ બનાવ અંગે ગઢશીશા પોલીસ સ્ટેશનમાં ગુનો નોંધી વધુ તપાસ હાથ ધરવામાં આવી છે.