વાગરાના સાવરિયા જનરલ સ્ટોરમાં એક્સપાયરી ડેટ ભૂંસી ભેળસેળનો પર્દાફાશ: ઝેરી ગાંઠિયાથી બાળક બીમાર પડતાં દુકાન સીલ

ભરૂચ જિલ્લાના વાગરા ખાતે આવેલા 'સાવરિયા જનરલ સ્ટોર'માં એક્સપાયરી ડેટ (વપરાશની અંતિમ તારીખ) ભૂંસીને જૂનો અને અખાદ્ય સામાન વેચવાનું ગંભીર કૌભાંડ સામે આવ્યું છે. આ ઘટનાને પગલે સ્થાનિક લોકોમાં ભારે રોષ જોવા મળી રહ્યો છે.

પ્રાપ્ત માહિતી અનુસાર, આ દુકાનમાંથી ખરીદેલા એક્સપાયર્ડ ગાંઠિયા ખાવાના કારણે એક માસૂમ બાળકની તબિયત લથડી હતી અને તે ગંભીર રીતે બીમાર પડ્યું હતું. બાળકની તબિયત લથડતાં સમગ્ર વિસ્તારમાં ચકચાર મચી જવા પામી હતી.

ઘટનાની ગંભીરતાને ધ્યાને લઈને વહીવટી તંત્ર અને ફૂડ એન્ડ ડ્રગ્સ વિભાગની ટીમ તાત્કાલિક ઘટનાસ્થળે દોડી પહોંચી હતી. ટીમે ત્વરિત કાર્યવાહી કરીને કૌભાંડી દુકાનને કાયમી ધોરણે બંધ (સીલ) કરાવી દીધી છે.

તંત્ર દ્વારા દુકાનમાં રહેલા શંકાસ્પદ ખાદ્ય પદાર્થોના નમૂના મેળવી લેબોરેટરીમાં પરીક્ષણ માટે મોકલવાની તજવીજ હાથ ધરવામાં આવી છે. માનવ જિંદગી સાથે ચેડાં કરનાર દુકાનદાર વિરુદ્ધ કાયદેસરની કડક કાર્યવાહી શરૂ કરવામાં આવી છે.