ଜୟପୁର ଆର୍ଟ କଲେଜରେ ଅଗ୍ନିକାଣ୍ଡ

ଜୟପୁର ଆର୍ଟ କଲେଜରେ ଅଗ୍ନିକାଣ୍ଡ । ସହର ମଧ୍ୟଭାଗରେ ଅବସ୍ଥିତ ପ୍ରତିଷ୍ଠିତ ଆର୍ଟ କଲେଜ ପରିସରରେ ହଠାତ୍ ଅଗ୍ନିକାଣ୍ଡ ଘଟି ବ୍ୟାପକ କ୍ଷୟକ୍ଷତି ଘଟିଛି । ବର୍ଷାଜନିତ ସର୍ଟସର୍କିଟ୍ ଯୋଗୁଁ ଏହି ନିଆଁ ଲାଗିଥିବା ସନ୍ଦେହ କରାଯାଉଛି।ନିଆଁର ତୀବ୍ରତା ଏତେ ଅଧିକ ଥିଲା ଯେ କଲେଜ କାର୍ଯ୍ୟାଳୟରେ ଥିବା ଦୁଇଟି କମ୍ପୁଟର ଏବଂ ଗୋଟିଏ ଟେଲିଭିଜନ ସମ୍ପୂର୍ଣ୍ଣ ପୋଡ଼ି ପାଉଁଶ ହୋଇଯାଇଛି । ଏହା ସହିତ ଅଫିସରେ ଥିବା ଅନେକ ଗୁରୁତ୍ୱପୂର୍ଣ୍ଣ ପ୍ରଶାସନିକ ଫାଇଲ୍, ନଥିପତ୍ର ତଥା ଜରୁରୀ କାଗଜପତ୍ର ଜଳି ନଷ୍ଟ ହୋଇଯାଇଛି ।
ଘଟଣା ସମ୍ପର୍କରେ ଖବର ପାଇବା ମାତ୍ରେ ଅଗ୍ନିଶମ ବାହିନୀ ଓ ସ୍ଥାନୀୟ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ଲଗାଣ ବର୍ଷା ଯୋଗୁଁ ଉଦ୍ଧାର କାର୍ଯ୍ୟରେ କିଛିଟା ବାଧା ସୃଷ୍ଟି ହୋଇଥିଲା। ଏହି ଅଗ୍ନିକାଣ୍ଡ ଯୋଗୁଁ କଲେଜ କର୍ତ୍ତୃପକ୍ଷଙ୍କ ବହୁ ମୂଲ୍ୟବାନ ରେକର୍ଡ ଓ ବୈଦ୍ୟୁତିକ ଉପକରଣ ନଷ୍ଟ ହୋଇଥିବାରୁ କଲେଜର ଅପୂରଣୀୟ କ୍ଷତି ଘଟିଛି । ଘଟଣାର ସମ୍ପୂର୍ଣ୍ଣ ତଦନ୍ତ ଜାରି ରହିଛି।