માંગરોળ પોલીસે યાદગાર સોસાયટીમાંથી જાહેરમાં જુગાર રમતા ૫ ઈસમોને રૂ. ૫૩,૦૨૦ ના મુદ્દામાલ સાથે ઝડપી પાડ્યા

માંગરોળ પોલીસની સરાહનીય કામગીરી સામે આવી છે. માંગરોળના નાગદા વિસ્તારમાં આવેલ યાદગાર સોસાયટી ખાતે જાહેરમાં જુગારનો અખાડો ચાલતો હોવાની બાતમી પોલીસને મળી હતી. આ બાતમીના આધારે પોલીસે તાત્કાલિક રેઈડ કરી જુગાર રમતા પાંચ ઈસમોને ઝડપી પાડ્યા હતા.

પોલીસે ઝડપાયેલા આરોપીઓ પાસેથી કુલ રૂ. ૫૩,૦૨૦ નો મુદ્દામાલ જપ્ત કર્યો છે. જેમાં રોકડા રૂ. ૨૫,૦૨૦, પાંચ મોબાઈલ ફોન જેની કિંમત રૂ. ૧૩,૦૦૦ અને એક મોટરસાયકલ જેની કિંમત રૂ. ૧૫,૦૦૦ નો સમાવેશ થાય છે. આ ઉપરાંત ગંજીપત્તાના પાના અને પાથરણું પણ કબજે લેવાયું છે.

પોલીસે હનીફ હાસમ હાસા, ફારૂક ઇબ્રાહીમભાઇ પટેલ, ઇસ્માઇલ ઉમરભાઈ બૂમડીયા, યાકુબ સુલેમાનભાઈ કાપા અને પ્રવીણ પીઠાભાઈ ખેર - આ તમામ માંગરોળના રહેવાસીઓને ઝડપી પાડ્યા છે. જોકે, આમદ ઉર્ફે ઠંડક હસન ધમેરીયા નામનો આરોપી પોલીસ રેઈડ દરમિયાન હાજર મળી આવ્યો ન હતો, પરંતુ તેની વિરુદ્ધ પણ કાયદેસરની કાર્યવાહી હાથ ધરવામાં આવી છે.

આ તમામ ઝડપાયેલા આરોપીઓ વિરુદ્ધ માંગરોળ પોલીસ સ્ટેશનમાં જુગારધારાની કલમ ૪ અને ૫ મુજબ ગુનો નોંધી કાયદેસરની કાર્યવાહી કરવામાં આવી છે. પોલીસની આ કાર્યવાહીથી જુગાર રમતા અન્ય ઈસમોમાં પણ ફફડાટ ફેલાયો છે.