માંડવી તાલુકાના મહુડી ગામના કૂવામાં દીપડો પડતાં ગ્રામજનોમાં ભય અને કુતૂહલ

માંડવી તાલુકાના મહુડી ગામે મોહનભાઈ છગનભાઈ વસાવાના કૂવામાં આજે સવારે લગભગ ૯ વાગ્યાની આસપાસ એક દીપડો પડી ગયો હતો. આ ઘટનાની જાણ થતાં જ સ્થાનિક ગ્રામજનોમાં ભારે કુતૂહલ અને ભયનો માહોલ છવાઈ ગયો હતો.

દીપડો કૂવામાં પડ્યાના સમાચાર વાયુવેગે ફેલાતાં મોટી સંખ્યામાં લોકો ઘટના સ્થળે એકત્ર થયા હતા. કૂવામાં દીપડો હોવાની વાતથી લોકોમાં ચિંતા પ્રસરી હતી.

ગ્રામજનોએ તાત્કાલિક આ અંગે વન વિભાગને જાણ કરી હતી. વન વિભાગની ટીમ ઘટના સ્થળે પહોંચીને દીપડાને સુરક્ષિત રીતે બહાર કાઢવાની કામગીરી હાથ ધરે તેવી અપેક્ષા રાખવામાં આવી રહી છે.