અંબાજી જતા પદયાત્રીઓને સ્કોર્પિયોએ અડફેટે લેતા દોલગઢ પાટિયા પાસે ચક્કાજામ અને વાહન સળગાવાયું

બનાસકાંઠા જિલ્લામાં અંબાજી દર્શન માટે પગપાળા જઈ રહેલા પદયાત્રીઓને દોલગઢ પાટિયા પાસે એક સ્કોર્પિયો ગાડીએ ટક્કર મારતા અકસ્માત સર્જાયો હતો. આ અકસ્માતમાં અનેક પદયાત્રીઓ ઘાયલ થયા હતા, જેના પગલે સ્થાનિક લોકો અને પદયાત્રીઓમાં ભારે રોષ જોવા મળ્યો હતો.

ઘટનાસ્થળે જ લોકોનો ટોળું એકત્ર થઈ ગયું હતું અને રોષે ભરાયેલા લોકોએ સ્કોર્પિયો ગાડીના કાચ તોડી નાખી ગાડીમાં આગચંપી કરી હતી. જેના કારણે દોલગઢ પાટિયા પાસે ચક્કાજામની સ્થિતિ સર્જાઈ હતી અને વાહનવ્યવહાર ખોરવાયો હતો.

પોલીસ ઘટનાસ્થળે પહોંચી હતી અને પરિસ્થિતિને કાબૂમાં લીધી હતી. પોલીસે સ્કોર્પિયો ગાડીના ચાલક ભરત પટેલની અટકાયત કરી લીધી છે. હાલમાં પોલીસ દ્વારા મેડિકલ રિપોર્ટના આધારે વધુ કાયદેસરની કાર્યવાહી હાથ ધરવામાં આવી રહી છે.