ભાદરવી મહામેળામાં અંબાજી ખાતે ભક્તિનો અનોખો માહોલ

બનાસકાંઠાના અંબાજી ખાતે ભાદરવી મહામેળાના બીજા દિવસે ભક્તિનો અનોખો માહોલ જોવા મળ્યો. સવારની મંગળા આરતીમાં મોટી સંખ્યામાં શ્રદ્ધાળુઓએ ઉપસ્થિત રહી ધન્યતા અનુભવી હતી.

માઈભક્તોનો ઉત્સાહ વધારવા માટે પોલીસ જવાનો પણ ગરબે ઘૂમીને ભક્તિમાં લીન થયા હતા. મેળાના પ્રથમ દિવસે જ 4.5 લાખથી વધુ ભક્તોએ મા અંબાના દર્શન કર્યા હતા.

અંબાજી તરફ જતા તમામ માર્ગો પર પદયાત્રીઓ, સંઘો અને ધજાઓ સાથે ભક્તોનું ઘોડાપૂર ઉમટી પડ્યું છે. આગામી 26 સપ્ટેમ્બર સુધી ચાલનારા આ મહામેળામાં સમગ્ર અંબાજી ધામ બોલ મા અંબા જય જય અંબાના નાદથી ગુંજી ઉઠ્યું છે.