અમરેલી: ધારી ગીર જંગલ વિસ્તારમાં ગાયોના ટોળાએ સિંહને ઉભી પૂછડીયે ભગાડ્યો

અમરેલી જિલ્લાના ધારી ગીર જંગલ વિસ્તારમાં એક અનોખી ઘટના સામે આવી છે. અહીં આવેલા એક માલધારીના નેસમાં ગાયોના ટોળા વચ્ચે એક સિંહ શિકાર કરવાના મૂડમાં આવી પહોંચ્યો હતો. જોકે, ગાયોએ એક થઈને સિંહનો સામનો કર્યો હતો.

સામાન્ય રીતે સિંહ જંગલના અન્ય પ્રાણીઓનો શિકાર કરતો હોય છે, પરંતુ આ ઘટનામાં માલધારીની ગાયો પણ કંઈ કમ નહોતી. સિંહને પોતાની તરફ આવતો જોઈને ગાયો ડરી નહોતી અને સામનો કરવા તૈયાર થઈ ગઈ હતી.

ગાયોના આ આક્રમક વલણને જોઈને શિકાર કરવા આવેલો સિંહ પણ ચોંકી ગયો હતો. આખરે ગાયોના ટોળાએ સિંહને ત્યાંથી ઉભી પૂછડીયે ભગાડી મૂક્યો હતો.