સુરતમાં ઉધના ઝોનમાં ભારે વરસાદથી રોડમાં મોટો ખાડો, ટ્રાફિકમાં ખલેલ

સુરત મહાનગરપાલિકાના ઉધના ઝોનમાં રાત્રિ દરમ્યાન ભારે વરસાદને કારણે ઉધના ગામ મેન રોડ તેમજ ઉધના-નવસારી માર્ગ પર ડામરનો રોડ ધસી જતાં મોટો ખાડો પડ્યો, જેના કારણે ટ્રાફિક વ્યવસ્થા ખોરવાઈ ગઈ અને વાહનચાલકોને ભારે મુશ્કેલીનો સામનો કરવો પડ્યો.

ઘટનાની જાણ મળતા જ મહાપાલિકા તંત્ર તાત્કાલિક પગલાં લઈને ખાડો અને સંબંધિત રોડનું સમારકામ શરૂ કર્યું. તાત્કાલિક સમારકામ છતાં, મુખ્ય માર્ગ પર પડેલા મોટા ખાડાના કારણે કલાકો સુધી વાહનવ્યવહાર પ્રભાવિત રહ્યો અને સ્થાનિકો ને ભારે અડચણો સહન કરવી પડી.

ઉધના દરવાજાથી નવસારી બજાર તરફ જવાના મુખ્ય માર્ગ પર ગટરના ચેમ્બરનું ઢાંકણું છેલ્લા બે દિવસથી તૂટેલી સ્થિતિમાં છે. આ ખુલ્લું અને જોખમી ચેમ્બર કોઈ પણ ક્ષણે મોટી દુર્ઘટના સર્જી શકે છે, જેના કારણે રહેવાસીઓ અને વેપારીઓમાં મહાપાલિકા તંત્રની નિષ્ક્રિયતા પ્રત્યે કડક રોષ જોવા મળી રહ્યો છે.

સ્થાનિક નાગરિકો અને વેપારીઓએ તાત્કાલિક અને અસરકારક સમાધાનની માંગ કરી છે, જેથી સુરક્ષિત માર્ગ અને ટ્રાફિક વ્યવસ્થા પુનઃસ્થાપિત થઈ શકે.