દાહોદના સંજેલીમાં ફૂડ એન્ડ ડ્રગ્સ વિભાગની મોટી કાર્યવાહી: ૧૧ મેડિકલ સ્ટોર્સમાં એકસાથે તપાસ હાથ ધરાઈ

દાહોદ જિલ્લાના સંજેલીમાં ફૂડ એન્ડ ડ્રગ્સ વિભાગ દ્વારા મેડિકલ સ્ટોર્સ પર મોટી કાર્યવાહી હાથ ધરવામાં આવી છે. જિલ્લા કક્ષાની વિશેષ ટીમે એકસાથે આશરે ૧૧ જેટલા મેડિકલ સ્ટોર્સમાં આકસ્મિક તપાસ શરૂ કરી છે. આ વ્યાપક તપાસને પગલે સ્થાનિક દવા વિક્રેતાઓમાં ફફડાટ ફેલાયો છે.

આ તપાસ દરમિયાન અધિકારીઓ દ્વારા સ્ટોર્સમાં દવાઓનો સ્ટોક, ખરીદ-વેચાણના બિલો, સત્તાવાર રજિસ્ટર તેમજ નિયમ અનુસાર ફાર્માસિસ્ટની હાજરીની સઘન ચકાસણી કરવામાં આવી રહી છે. આ સાથે જ, ડોક્ટરની ચિઠ્ઠી વિના ગ્રાહકોને અપાતી દવાઓ અંગે પણ વિભાગે કડક તપાસ હાથ ધરી છે.

ફૂડ એન્ડ ડ્રગ્સ વિભાગની આ ઓચિંતી કાર્યવાહી દરમિયાન કેટલાક મેડિકલ સ્ટોર્સના સંચાલકો સ્થળ પર હાજર ન હોવાની વિગતો પણ સામે આવી છે, જે અંગે પણ તપાસ કરવામાં આવી રહી છે.

વિભાગના અધિકારીઓના જણાવ્યા અનુસાર, આ તપાસ પ્રક્રિયા પૂર્ણ થયા બાદ જો કોઈ પણ મેડિકલ સ્ટોરમાં નિયમોનું ઉલ્લંઘન કે ગેરરીતિ સામે આવશે, તો સંબંધિત સંચાલકો સામે આગામી સમયમાં કાયદેસરની કડક કાર્યવાહી કરવામાં આવશે.