સાવરકુંડલાના પૈતૃક મકાનમાં હિસ્સો ન મળતાં લીલીયાના યુવકે ઝેરી દવા ગટગટાવી, હાલત ગંભીર

લીલીયા, તા. ૦૩: સાવરકુંડલા ખાતે આવેલા પૈતૃક મકાનમાં પોતાનો કાયદેસરનો હિસ્સો આપવા ફોઈના દીકરાઓએ ઇનકાર કરતાં લીલીયા ખાતે રહેતા એક યુવકે ઝેરી ગોળીઓ ગટગટાવી આપઘાતનો પ્રયાસ કર્યો હોવાની ચકચારી ઘટના સામે આવી છે.

મળતી માહિતી મુજબ, યુવકના પરિવારનું સાવરકુંડલા ખાતે જૂનું મકાન આવેલું છે, જેમાં હાલ તેના ફોઈના દીકરાઓ વસવાટ કરે છે. યુવકે મકાનમાં પોતાનો કાયદેસરનો હક-હિસ્સો માંગ્યો હતો, પરંતુ સંબંધીઓએ કોઈપણ પ્રકારનો ભાગ આપવાનો સ્પષ્ટ ઇનકાર કર્યો હતો.

આ બાબતથી યુવકને ભારે આઘાત લાગ્યો હતો અને સતત માનસિક તાણમાં રહેતા તેણે લીલીયા સ્થિત પોતાના ઘરે અનાજમાં નાખવાની ઝેરી ટીકડીઓ ખાઈ લીધી હતી. બનાવની જાણ થતાં પરિવારજનો દોડી આવ્યા હતા અને યુવકને તાત્કાલિક સારવાર માટે હોસ્પિટલ ખસેડાયો હતો.

લીલીયા પોલીસ દ્વારા સમગ્ર બનાવ અંગે વધુ તપાસ હાથ ધરવામાં આવી હોવાનું જાણવા મળે છે.