ફ્રાન્સના બૂસી-સેંટ-જ્યોર્જેસમાં ‘નમસ્તે’ શિલ્પનું અનાવરણ

ફ્રાન્સના ગ્રેટર પેરિસના બૂસી-સેંટ-જ્યોર્જેસમાં ભારતીય સંસ્કૃતિનું પ્રતિક ‘નમસ્તે’ શિલ્પ સ્થાપિત કરવામાં આવ્યું. શિલ્પનું અનાવરણ બૂસી-સેંટ-જ્યોર્જેસના મેયર યાન ડુબોસ્ક, ભારતના કોન્સ્યુલર મિનિસ્ટર કે. જી. પ્રવીણ કુમાર અને બીએપીએસ સંતો હાજર રહીને કર્યું.

‘નમસ્તે’ મુદ્રા સ્વાગત, સન્માન અને નમ્રતાનું પ્રતીક છે, અને એવન્યુ દુ જનરલ-દ-ગોલ પર સ્થાપિત આ શિલ્પ શહેરમાં પ્રવેશતા લોકોને ભારતીય પરંપરાનો સંદેશ આપશે. આ શિલ્પ ભારત-ફ્રાન્સની મિત્રતા અને સાંસ્કૃતિક સંબંધોનું પ્રતીક બની રહ્યું છે.

શિલ્પના અનાવરણ સાથે ફ્રાન્સમાં યોજાનાર 13 દિવસીય ‘ફેસ્ટિવલ ઓફ કલ્ચર’નું આયોજન પણ જોડાયેલું છે, જે ભારતીય સંસ્કૃતિ અને પરંપરાઓને ફ્રાન્સની ધરતી પર રજૂ કરશે. મેયર યાન ડુબોસ્કે જણાવ્યું કે જોડાયેલા હાથ શાંતિ, કરુણા અને બે સંસ્કૃતિઓના સંગમનું પ્રતીક છે.

ભારતના કોન્સ્યુલર મિનિસ્ટરે શિલ્પને ભારતીય વારસા અને સભ્યતાનું પ્રતીક ગણાવીને, આનંદસ્વરૂપદાસ સ્વામીએ કહ્યું કે ‘નમસ્તે’ આપણને બીજાથી શીખવું, આદર કરવો અને સેવા કરવી જેવા મૂલ્યો શીખવે છે.