અમરેલી: રાજુલામાં ૬૨ વર્ષની પરંપરા જાળવી રાખી જન્માષ્ટમીની ભવ્ય ઉજવણીની તૈયારીઓ શરૂ

અમરેલી જિલ્લાના રાજુલા શહેરમાં દર વર્ષની જેમ આ વર્ષે પણ ૬૨ વર્ષની પરંપરા જાળવી રાખીને જન્માષ્ટમી પર્વની ભવ્ય ઉજવણી કરવામાં આવશે. આ ઉજવણીના આયોજનને લઈને રાજુલા જન્માષ્ટમી ઉત્સવ સમિતિની એક ખાસ બેઠક આહિર સમાજની વાડી ખાતે યોજાઈ હતી. આ બેઠકમાં આગામી જન્માષ્ટમી પર્વ નિમિત્તે યોજાનારી શોભાયાત્રા અને અન્ય વિવિધ કાર્યક્રમોના આયોજન અંગે વિસ્તૃત ચર્ચા કરવામાં આવી હતી.

સમિતિ દ્વારા અગાઉના વર્ષોમાં થયેલા આયોજનની સમીક્ષા કરવામાં આવી હતી અને આગામી ઉજવણી વધુ ભવ્ય અને શિસ્તબદ્ધ રીતે થાય તે માટે જરૂરી આયોજન અંગે સૂચનો આપવામાં આવ્યા હતા. આ ઉપરાંત, જન્માષ્ટમી પર્વ દરમિયાન વિવિધ સંસ્થાઓ અને ગ્રુપ દ્વારા કરવામાં આવતી ઉત્કૃષ્ટ કામગીરીને પ્રોત્સાહન આપવા માટે ઈનામ વિતરણનું પણ આયોજન કરાયું હતું. આગેવાનોના હસ્તે વિજેતા તથા શ્રેષ્ઠ કામગીરી કરનાર ગ્રુપને ઈનામ આપી સન્માનિત કરવામાં આવશે.

આ મહત્વપૂર્ણ બેઠકમાં જયંતીભાઈ જાની, જયેશભાઈ શેઠ, પ્રવીણભાઈ બાવળીયા, ભુપતભાઈ ધોળકિયા, અર્જુનભાઈ ગોહિલ સહિત સમિતિના સભ્યો ઉપસ્થિત રહ્યા હતા. તેમની સાથે નગરપાલિકા પ્રમુખ મયુરભાઈ દવે, મનીષભાઈ વાળા, યુવરાજભાઈ ચાંદુ સહિત શહેરના અન્ય આગેવાનો પણ જોડાયા હતા અને આયોજનને સફળ બનાવવા માટે પોતાના વિચારો વ્યક્ત કર્યા હતા.