નવસારી: મોપેડ પર દારૂ લઈ જતી મહિલાનો વીડિયો વાયરલ, પોલીસે તપાસ હાથ ધરી

નવસારી જિલ્લામાં કથિત રીતે ખુલ્લેઆમ દારૂનું વેચાણ થતું હોવાની ઘટનાઓ સામે આવી રહી છે. તાજેતરમાં મરોલી ઉભરાટ રોડ પર એક મહિલા મોપેડ પર દારૂ લઈને જઈ રહી હતી, જેનો વીડિયો સોશિયલ મીડિયા પર વાયરલ થયો છે. આ ઘટનાએ ફરી એકવાર રાજ્યમાં દારૂબંધીના કાયદાના અમલીકરણ પર પ્રશ્નાર્થ સર્જ્યો છે.

પ્રાપ્ત માહિતી અનુસાર, ગામના કેટલાક યુવકોએ શંકાસ્પદ રીતે મોપેડ પર જતી એક મહિલાને રોકી હતી. યુવાનો દ્વારા પૂછપરછ કરવામાં આવતા મહિલા પાસે દારૂ હોવાનું બહાર આવ્યું હતું. આ ઘટના બાદ યુવકોએ મહિલાનો વીડિયો બનાવી વાયરલ કર્યો હતો, જેમાં ગામમાં ખુલ્લેઆમ દારૂ મળતો હોવાના આક્ષેપો પણ કરવામાં આવ્યા છે.

આ વીડિયો વાયરલ થયા બાદ સ્થાનિક મરોલી પોલીસે આ મામલે ગંભીર નોંધ લીધી છે. પોલીસે દારૂ લઈ જતી મહિલાની ધરપકડ કરવાની તજવીજ હાથ ધરી છે અને આ પ્રકરણમાં વધુ તપાસ શરૂ કરી છે. આ ઘટના લઠ્ઠાકાંડ બાદ પણ નવસારી જિલ્લામાં દારૂના વેચાણની પ્રવૃત્તિઓ પર અંકુશ મેળવવામાં આવી રહેલી મુશ્કેલીઓ તરફ ઈશારો કરે છે.