મોડાસામાં રખડતા ઢોરનો આતંક: સરઘસમાં ગાયો ઘૂસી જતાં ૧૦ બાળકો ઇજાગ્રસ્ત

મોડાસા શહેરમાં રખડતા ઢોરનો ત્રાસ દિવસેને દિવસે વધી રહ્યો છે. પાલિકાના ચીફ ઓફિસર દ્વારા અગાઉ ઢોર નિયંત્રણ અંગે ખાતરી આપવામાં આવી હોવા છતાં, ગ્રાઉન્ડ લેવલ પર પરિસ્થિતિ સતત વણસી રહી છે, જેના કારણે સ્થાનિકોમાં ભારે રોષ જોવા મળી રહ્યો છે.

તાજેતરમાં શહેરમાંથી નીકળેલા એક સરઘસ દરમિયાન અચાનક ગાયોનું ટોળું ઘૂસી જતાં ભારે નાસભાગ મચી ગઈ હતી. ગાયોના હુમલા અને અફરાતફરીના માહોલમાં આશરે ૧૦ જેટલા બાળકો ઇજાગ્રસ્ત થયા હોવાના ચોંકાવનારા દ્રશ્યો સામે આવ્યા છે.

આ સમગ્ર ઘટનાનો વીડિયો સોશિયલ મીડિયા પર વાયરલ થતાં તંત્રની કામગીરી સામે સવાલો ઉભા થયા છે. નગરપાલિકાની ઢીલી નીતિને કારણે નિર્દોષ નાગરિકો અને બાળકોએ ભોગ બનવું પડી રહ્યું છે, ત્યારે વહીવટીતંત્ર દ્વારા નક્કર કાર્યવાહી કરવામાં આવે તેવી માંગ ઉઠી છે.