બાલાસિનોર-સેવાલિયા હાઇવે પર મસમોટા ખાડા: વાહનચાલકો પરેશાન

બાલાસિનોરથી સેવાલિયા તરફ જતા મુખ્ય માર્ગની હાલત અત્યંત બિસ્માર બની ગઈ છે. રસ્તા પર પડેલા મોટા ખાડાઓને કારણે અહીંથી પસાર થતા હજારો નાના-મોટા વાહનચાલકો ભારે હાલાકીનો સામનો કરી રહ્યા છે.

સ્થાનિક વાહનચાલકોના જણાવ્યા અનુસાર, રસ્તા પરના ખાડા એટલા ઊંડા છે કે વાહન અચાનક ખાડામાં પછડાતા મુસાફરોને કમરના દુખાવા જેવી શારીરિક સમસ્યાઓનો સામનો કરવો પડે છે. આ માર્ગ પરથી દરરોજ મોટી સંખ્યામાં લોકો અવરજવર કરે છે, પરંતુ રસ્તાની જર્જરિત હાલતને કારણે અકસ્માતનો ભય પણ સતત રહે છે.

તંત્ર દ્વારા આ રસ્તાના ખાડાઓનું તાત્કાલિક સમારકામ કરવામાં આવે તેવી માંગ ઉઠી છે. વાહનચાલકોએ વહેલી તકે રસ્તો મરામત કરી સુગમ અને સુરક્ષિત મુસાફરી પૂરી પાડવા માટે તંત્રને વિનંતી કરી છે.