શામળાજી હાઈવે પર પશુ વેપારીનું અપહરણ કરી ૧.૪૦ લાખની લૂંટ, અસામાજિક તત્વોનો આતંક

મોડાસા-શામળાજી હાઈવે પર અસામાજિક તત્વોનો આતંક સામે આવ્યો છે. ભવાનપુર નજીક પિકઅપ ડાલામાં જઈ રહેલા એક પશુ વેપારીને નંબર પ્લેટ વગરની કારમાં આવેલા શખ્સોએ આંતરીને અપહરણ કર્યું હતું. લૂંટારાઓએ વેપારીને ઢોરમાર મારી ડુંગર વિસ્તારમાં લઈ જઈને બંધક બનાવ્યા હતા.

આ ઘટનામાં લૂંટારાઓએ પશુ વેપારી પાસેથી ૧.૪૦ લાખ રૂપિયાની કિંમતની ભેંસો અને રોકડ રકમની લૂંટ ચલાવી હતી. અસામાજિક તત્વોએ વેપારીને જાનથી મારી નાખવાની ધમકી આપીને ફરાર થઈ ગયા હતા, જેના કારણે સમગ્ર પંથકમાં ભયનો માહોલ ફેલાયો છે.

શામળાજી પોલીસને ખુલ્લો પડકાર ફેંકતી આ ઘટના બાદ પોલીસ તંત્ર દોડતું થયું છે. હાઈવે પર બેફામ બનેલા લૂંટારાઓને પકડવા માટે પોલીસે તપાસના ચક્રો ગતિમાન કર્યા છે. વેપારી સાથે બનેલી આ લૂંટની ઘટનાને પગલે સ્થાનિકોમાં ભારે રોષ જોવા મળી રહ્યો છે.