વડોદરામાં મંગલ પાંડે બ્રિજ પાસે વિશ્વામિત્રી નદીમાંથી મહાકાય મગર બહાર આવતા લોકોમાં ફફડાટ

વડોદરામાં મંગલ પાંડે બ્રિજ પાસે વિશ્વામિત્રી નદીમાંથી એક મહાકાય મગર બહાર આવીને રસ્તા પર આવી પહોંચ્યો હતો. ભરચક વિસ્તારમાં મગર દેખાતાની સાથે જ આસપાસના લોકોના ટોળાં એકત્ર થઈ ગયા હતા અને વિસ્તારમાં ભારે ઉત્તેજના જોવા મળી હતી.

મગરને રસ્તા પર જોઈને ત્યાં હાજર લોકોએ પથ્થરમારો શરૂ કર્યો હતો. લોકો દ્વારા કરવામાં આવેલા પથ્થરમારાને કારણે મગર ડરી ગયો હતો અને તરત જ તે પાછો વિશ્વામિત્રી નદીના પાણીમાં સરકી ગયો હતો.

વિશ્વામિત્રી નદીમાં મગરોની સંખ્યા વધુ હોવાથી અવારનવાર આવા કિસ્સાઓ સામે આવતા હોય છે. સદનસીબે આ ઘટનામાં કોઈ જાનહાનિ કે ઈજાના સમાચાર મળ્યા નથી, પરંતુ મગરના આગમનને પગલે સ્થાનિક લોકોમાં થોડા સમય માટે ભયનો માહોલ જોવા મળ્યો હતો.