અમદાવાદ: નિકોલ રિંગ રોડ પરથી મળી આવેલ માસૂમ બાળક માટે પોલીસ બની પરિવાર

અમદાવાદના નિકોલ રિંગ રોડ પરથી આજે એક માસૂમ બાળક ત્યજી દેવાયેલી હાલતમાં મળી આવ્યું હતું. આ ઘટનાની જાણ થતા જ નિકોલ પોલીસ સ્ટેશનનો સ્ટાફ તાત્કાલિક ઘટનાસ્થળે પહોંચ્યો હતો અને બાળકને સુરક્ષિત રીતે પોતાની કસ્ટડીમાં લીધું હતું.

બાળકની પ્રાથમિક સારવાર અને સંભાળની વ્યવસ્થા કર્યા બાદ, નિકોલ પોલીસ સ્ટેશનમાં તેના સ્વાગત માટે વિશેષ તૈયારીઓ કરવામાં આવી હતી. પોલીસ સ્ટાફ દ્વારા પોલીસ સ્ટેશનને ઘરની જેમ સુંદર રીતે શણગારવામાં આવ્યું હતું, જેથી બાળકને હૂંફાળું વાતાવરણ મળી રહે.

હાલમાં આ બાળકના માતા-પિતાની ઓળખ અજાણી છે, પરંતુ પોલીસ સ્ટાફે તેને ભરપૂર વહાલ આપીને એક પરિવારની જવાબદારી નિભાવી છે. અમદાવાદ પોલીસની આ સંવેદનશીલ કામગીરીની સમગ્ર વિસ્તારમાં પ્રશંસા થઈ રહી છે.