અમદાવાદના નિકોલ વિસ્તારમાં નકલી દારૂ બનાવવાનું મોટું નેટવર્ક ઝડપાયું

અમદાવાદના નિકોલ વિસ્તારમાં નકલી દારૂ બનાવવાનો કાળો કારોબાર સામે આવ્યો છે. ભાવનગરના ચકચારી લઠ્ઠાકાંડ બાદ હવે અમદાવાદમાં પણ આ પ્રકારની ગંભીર ઘટના બનતા તંત્ર હરકતમાં આવ્યું છે. નિકોલ પોલીસે બાતમીના આધારે દરોડા પાડીને ડુપ્લિકેટ દારૂ બનાવતા એક મોટા નેટવર્કનો પર્દાફાશ કર્યો છે.

પોલીસની આ કાર્યવાહી દરમિયાન સ્થળ પરથી હાનિકારક કેમિકલનો મોટો જથ્થો મળી આવ્યો છે. આરોપીઓ બ્રાન્ડેડ દારૂની બોટલોમાં આ કેમિકલયુક્ત નકલી દારૂ ભરીને લોકોના સ્વાસ્થ્ય અને જીવ સાથે ગંભીર ચેડાં કરી રહ્યા હતા. પોલીસે આ મામલે એક આરોપીની ધરપકડ કરી વધુ તપાસ હાથ ધરી છે.

રાજ્યમાં દારૂબંધીના કડક કાયદાઓ હોવા છતાં બૂટલેગરો દ્વારા આ પ્રકારની પ્રવૃત્તિઓ ચલાવવામાં આવતા પોલીસની કામગીરી સામે પણ સવાલો ઉભા થયા છે. હાલમાં પોલીસ દ્વારા આ નેટવર્કમાં અન્ય કોણ સામેલ છે અને આ દારૂ ક્યાં સપ્લાય કરવામાં આવતો હતો તે દિશામાં તપાસ કરવામાં આવી રહી છે.