ગાંધીનગર ગિફ્ટ સિટી ક્લબમાં સીએ વચ્ચે મારામારી: ચૂંટણીની જૂની અદાવતમાં એકને ઈજા

ગાંધીનગરના ગિફ્ટ સિટી ક્લબમાં આયોજિત એક હાઈપ્રોફાઈલ કાર્યક્રમમાં બે ચાર્ટર્ડ એકાઉન્ટન્ટ્સ (સીએ) વચ્ચે ચૂંટણીની જૂની તકરારને લઈને ઉગ્ર બોલાચાલી બાદ છુટ્ટા હાથની મારામારી થઈ હતી. આ ઘટનાને પગલે કાર્યક્રમમાં અફરાતફરીનો માહોલ સર્જાયો હતો.

આ કાર્યક્રમમાં ઈન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઈન્ડિયા (ICAI) ના રાષ્ટ્રીય પ્રમુખ સહિત દેશના ટોચના ચાર્ટર્ડ એકાઉન્ટન્ટ્સ હાજર રહ્યા હતા. આટલી ગરિમાપૂર્ણ ઉપસ્થિતિ વચ્ચે થયેલી મારામારીની ઘટના ચર્ચાનો વિષય બની છે.

આ મારામારીમાં એક સીએને માથા ના ભાગે ગંભીર ઈજાઓ પહોંચી હતી, જેના કારણે તેમને માથામાં ૩ ટાંકા આવ્યા હતા. ઈજાગ્રસ્ત સભ્ય દ્વારા આ મામલે ડભોડા પોલીસ સ્ટેશનમાં ફરિયાદ નોંધાવવામાં આવી છે, જેના આધારે પોલીસે વધુ તપાસ હાથ ધરી છે.