હિંમતનગરના રાજપુર નજીકથી નવજાત બાળકીને વેચવા જતી ટોળકી ઝડપાઈ

હિંમતનગરના રાજપુર વિસ્તાર નજીકથી એક ચોંકાવનારી ઘટના સામે આવી છે, જેમાં નવજાત બાળકીને વેચવા માટે લઈ જતી એક ટોળકીને પોલીસે ઝડપી પાડી છે. આરોપીઓ ઇકો કારમાં સવાર થઈને બાળકીની હેરાફેરી કરી રહ્યા હતા ત્યારે પોલીસને આ અંગેની બાતમી મળી હતી.

પોલીસે બાતમીના આધારે રાજપુર નજીક વોચ ગોઠવી ઇકો કારને અટકાવી તપાસ હાથ ધરી હતી. તપાસ દરમિયાન કારમાંથી નવજાત બાળકી મળી આવી હતી, જેને વેચવા માટે લઈ જવામાં આવી રહી હોવાનું પ્રાથમિક તપાસમાં બહાર આવ્યું છે.

પોલીસે આ મામલે સંડોવાયેલા શખ્સોની અટકાયત કરી વધુ તપાસ હાથ ધરી છે. આ ઘટનાને પગલે સમગ્ર વિસ્તારમાં ચકચાર મચી ગઈ છે અને પોલીસ દ્વારા આ ટોળકીના અન્ય સભ્યો કે આ પ્રકારના અન્ય કોઈ ગુનામાં તેમની સંડોવણી છે કે કેમ તે દિશામાં સઘન પૂછપરછ કરવામાં આવી રહી છે.