વડોદરા: સમા-સાવલી વિસ્તારની રેસ્ટોરન્ટમાં પાલિકાના દરોડા, ગંદકી મળતા રેસ્ટોરન્ટ બંધ કરાઈ

વડોદરા મહાનગરપાલિકાની ખોરાક શાખા દ્વારા શહેરના સમા-સાવલી વિસ્તારમાં આવેલી 'હરિઓમ દાલબાટી કાઠિયાવાડી' રેસ્ટોરન્ટમાં ઓચિંતી તપાસ હાથ ધરવામાં આવી હતી. આ દરોડા દરમિયાન રસોડામાં ભારે ગંદકી જોવા મળી હતી, જે ગ્રાહકોના સ્વાસ્થ્ય સાથે ચેડા સમાન છે.

તપાસ દરમિયાન રેસ્ટોરન્ટના ફ્રિજમાં પણ અત્યંત અસ્વચ્છતા જોવા મળી હતી. ખાદ્ય પદાર્થોની જાળવણીમાં બેદરકારી અને સ્વચ્છતાના અભાવને ગંભીરતાથી લઈને આરોગ્ય વિભાગ દ્વારા તાત્કાલિક અસરથી રેસ્ટોરન્ટને એક દિવસ માટે બંધ કરાવી દેવામાં આવી છે.

આ મામલે જવાબદાર સંચાલક સામે પાલિકાના નિયમો મુજબ દંડનીય કાર્યવાહી હાથ ધરવામાં આવશે. પાલિકાની આ કાર્યવાહીથી વિસ્તારના અન્ય ખાદ્ય વિક્રેતાઓમાં પણ ફફડાટ ફેલાયો છે.