વલસાડ: ઉમરગામમાં જ્વેલર્સની દુકાનમાં ચોરી કરવા ઘૂસેલા ચોરો ફસાયા, જીવ બચાવવા પોતે જ પોલીસને ફોન કર્યો

વલસાડના ઉમરગામમાં એક વિચિત્ર કિસ્સો સામે આવ્યો છે, જ્યાં જ્વેલર્સની દુકાનમાં ચોરી કરવાના ઈરાદે ઘૂસેલા ચોરોને લેવાના દેવા પડી ગયા હતા. દુકાનમાં ચોરી દરમિયાન અવાજ થતા આસપાસના સ્થાનિકો જાગી ગયા હતા અને તેમણે તાત્કાલિક દુકાનનું શટર બહારથી બંધ કરી દીધું હતું.

સ્થાનિકોના ટોળાથી ગભરાયેલા અને દુકાનમાં ફસાઈ ગયેલા ચોરોની હાલત કફોડી થઈ ગઈ હતી. ટોળું બહાર એકઠું થઈ જતાં ચોરોને પોતાના જીવનું જોખમ લાગ્યું હતું, જેના કારણે તેમણે અંતે લાચાર થઈને 112 નંબર પર ફોન કરીને પોલીસને મદદ માટે બોલાવવી પડી હતી.

ચોરીનો પ્લાન નિષ્ફળ જવાની સાથે ચોરોએ પોલીસની સુરક્ષામાં જ બહાર આવવું પડ્યું હતું. પોલીસની ગાડીમાં બેસીને જ તેઓ સુરક્ષિત રીતે બહાર નીકળી શક્યા હતા, જે સમગ્ર વિસ્તારમાં ચર્ચાનો વિષય બન્યો છે.