વીરપુરમાં રખડતા પશુઓનું આતંક, અલ્ટો કાર-પશુ અકસ્માતમાં પશુનું મોત

મહીસાગર જિલ્લામાં આવેલ વીરપુરમાં રખડતા પશુઓ અને આખલાઓનો ત્રાસ દિવસો દિવસે ગંભીર બની રહ્યો છે. જાહેર માર્ગો પર ધોળા દિવસે પણ પશુઓ અડિંગો જમાવી બેસતા હોવાથી વાહનચાલકો માટે અકસ્માતનું જોખમ સતત વધી રહ્યું છે.

ગત રાત્રે વીરપુરમાં અલ્ટો કાર અને રખડતા પશુ વચ્ચે ગંભીર અકસ્માત થયો, જેમાં પશુનું મોત થયું. આ ઘટનાએ ફરી એકવાર જાહેર માર્ગો પર રખડતા પશુઓની સમસ્યાને પ્રકાશમાં લાવી.

પશુઓની અચાનક ઉપસ્થિતિને કારણે અગાઉ પણ અનેક સ્થળોએ વાહનોનું નિયંત્રણ ગુમાવવું પડ્યું છે, ખાસ કરીને રાત્રિ સમયમાં આ જોખમ વધે છે. શહેરમાં વાહનવ્યવહાર સતત વધી રહ્યો છે, જ્યારે રસ્તાઓ પર પશુઓનો અડિંગો યથાવત રહે છે, જેના કારણે સ્થાનિકોમાં રોષ અને તાત્કાલિક પગલાંની માંગ ઊભી થઈ છે.

સ્થાનિકોનું કહેવું છે કે તંત્રને રખડતા પશુઓને પકડીને યોગ્ય સ્થળે ખસેડવા અને જાહેર માર્ગોને પશુમુક્ત બનાવવા માટે તાત્કાલિક કાર્યવાહી કરવી જોઈએ, જેથી અકસ્માતો અને જાનહાનિની શક્યતા ઘટાડી શકાય.