હિંમતનગર નેશનલ હાઈવે પર આખલા સાથે બે કાર અથડાતા અકસ્માત: LCBની સરકારી ગાડી પણ પલટી

સાબરકાંઠાના હિંમતનગરમાં નેશનલ હાઈવે પર રખડતા આખલાઓના કારણે એક મોટો અકસ્માત સર્જાયો હતો. હાઈવે પર બેઠેલા આખલા સાથે એકસાથે બે ગાડીઓ અથડાતા વાહનચાલકોમાં ફફડાટ વ્યાપી ગયો હતો. સૌપ્રથમ એક સામાન્ય કાર આખલા સાથે અથડાઈને રોડ પર પલટી મારી ગઈ હતી.

આ ઘટનાના થોડી જ વાર બાદ, ત્યાંથી પસાર થતી સ્થાનિક LCB પોલીસની સરકારી ગાડી પણ એ જ સ્થળે આખલા સાથે અથડાઈને પલટી ગઈ હતી. નોંધનીય છે કે, LCBની આ સરકારી ગાડીને બીજીવાર આ પ્રકારે અકસ્માત નડ્યો છે. સદનસીબે, બંને વાહનોમાં સવાર લોકોને માત્ર સામાન્ય ઈજાઓ જ પહોંચી હતી.

નેશનલ હાઈવે પર રખડતા ઢોર અને આખલાઓના જમાવડાને કારણે સતત સર્જાતા અકસ્માતોને લઈને સ્થાનિક લોકોમાં ભારે આક્રોશ જોવા મળ્યો હતો. ઘટનાસ્થળે દોડી આવેલા લોકોએ આ સમસ્યાના કાયમી ઉકેલ માટે માંગ કરી હતી.