Lait kapati

દેવભૂમિ દ્વારકાના રૂપણ બંદર વિસ્તારમાં છેલ્લા કેટલાક સમયથી વીજ પુરવઠાની ગંભીર સમસ્યા સામે આવી રહી છે. રૂપણ બંદરમાં દર એક કલાકે લાઈટ આવવા-જવાની (અનિયમિત પાવર કટ) પ્રક્રિયા ચાલુ રહેતા સ્થાનિક રહીશો અને ખાસ કરીને માછીમાર સમુદાય ભારે મુશ્કેલીનો સામનો કરી રહ્યો છે.
વીજળીની આ અવારનવારની અસ્થિરતાના કારણે નાના બાળકોની ઊંઘ વેરવિખેર થઈ રહી છે. મોડી રાત્રે અચાનક લાઈટ જતી રહેવાને કારણે ઉકળાટ અને ગરમીથી બાળકો જાગી જાય છે અને રાતભર હેરાન થાય છે, જેનાથી વાલીઓ પણ ભારે ચિંતામાં મુકાયા છે.
રૂપણ બંદરના સ્થાનિક માછીમારોએ પોતાની વ્યથા ઠાલવતા જણાવ્યું હતું કે, વીજળીના આવા અનિયમિત સમયપત્રકને કારણે તેમના રોજિંદા કામકાજ, બંદર પરની પ્રવૃત્તિઓ અને જીવનશૈલી પર ખૂબ માઠી અસર પડી રહી છે. એક કલાક લાઈટ આવે અને એક કલાક જતી રહે તેવી સ્થિતિને કારણે ધંધાકીય કામકાજ ઉપરાંત ઘરોમાં પણ ભારે અવરોધ ઊભો થાય છે.
રૂપણ બંદરના સ્થાનિકો અને માછીમાર સમાજ દ્વારા માંગ કરવામાં આવી રહી છે કે વીજ કંપની અને તંત્ર દ્વારા આ ગંભીર સમસ્યાની વહેલી તકે નોંધ લેવામાં આવે અને વિસ્તારમાં સતત તેમજ પૂરતો વીજ પુરવઠો પૂરો પાડવામાં આવે જેથી લોકોને આ હાલાકીમાંથી રાહત મળી શકે.