ઈડર પાસે GSRTC બસનો અકસ્માત, તમામ મુસાફરો સલામત

ઈડર નજીકના સાપાવાડા ગામમાં આજે વહેલી સવારે લગભગ 4 વાગ્યે GSRTCની ‘સૂર્યનગરી’ સ્લીપર કોચ બસ એક અકસ્માતનો શિકાર બની ગઈ. બસ સુરતથી અંબાજી તરફ જઈ રહી હતી, ત્યારે તે રોડની સાઇડ પરથી નીચે ખાડામાં ઉતરી ગઈ.

અકસ્માત સમયે બસમાં આશરે 25 મુસાફરો સવાર હતા. સદનસીબે, આ દુર્ઘટનામાં કોઈ પણ મુસાફર ઘાયલ થયો નથી અને તમામ મુસાફરો સલામત રહ્યા છે, જેના કારણે મોટી જાનહાનિ ટળી છે.

અકસ્માતની જાણ થતાં જ આસપાસના ગ્રામજનો ઘટના સ્થળે દોડી આવ્યા અને મુસાફરોને મદદ કરવા માટે આગળ આવ્યા. સ્થાનિક લોકોની તાત્કાલિક મદદથી મુસાફરોને સલામત રીતે બહાર કાઢવામાં આવ્યા.