અમદાવાદ: સિગારેટના પૈસા બાબતે પાન પાર્લર સંચાલક પર હુમલો, CCTV ફૂટેજ બાદ ચાર ઝડપાયા

અમદાવાદ શહેરના સિંગરવા ગામમાં સિગારેટના પૈસા ચૂકવવા બાબતે થયેલી સામાન્ય તકરાર મારામારીમાં પરિણમી હતી. પ્રાપ્ત માહિતી અનુસાર, ચાર શખ્સોએ પાન પાર્લરના સંચાલક સાથે પૈસા બાબતે ઉગ્ર બોલાચાલી કરી હતી અને ત્યારબાદ લાકડાના પાટિયા તથા સ્ટૂલ વડે હુમલો કર્યો હતો.

આ સમગ્ર ઘટનાક્રમ નજીકમાં લાગેલા CCTV કેમેરામાં સ્પષ્ટપણે કેદ થઈ ગયો હતો. CCTV ફૂટેજના આધારે, પાન પાર્લર સંચાલકે પોલીસમાં ફરિયાદ નોંધાવી હતી. પોલીસે તાત્કાલિક કાર્યવાહી હાથ ધરીને ફરિયાદના આધારે ચારેય આરોપીઓને ઝડપી પાડ્યા હતા.

ઓઢવ પોલીસે આ મામલે ગુનો નોંધીને કાયદેસરની કાર્યવાહી હાથ ધરી છે. પોલીસે આરોપીઓને કાયદાનું ભાન કરાવવા માટે જાહેરમાં કાર્યવાહી કરી હતી, જેથી આવા બનાવોનું પુનરાવર્તન ન થાય.