અમદાવાદ: ગાડી ટકરાવવાની બાબતમાં સગીર પર દુકાનમાં ઘૂસી હુમલો, CCTVમાં કેદ

અમદાવાદના ઢાલગરવાડ વિસ્તારમાં રસ્તા પર ગાડી ટકરાવવાની સામાન્ય બાબતમાં એક 17 વર્ષીય સગીર પર હુમલો થયો હતો. પ્રાથમિક માહિતી અનુસાર, રસ્તા પર થયેલી મારામારી બાદ સાંજના સમયે સાતથી આઠ જેટલા લોકોનું ટોળું દુકાનમાં ઘૂસી આવ્યું હતું.

આ ટોળાએ દુકાનમાં હાજર સગીર અમાન અને તેના કાકા પર ગાળો બોલી માર માર્યો હતો. સમગ્ર ઘટના દુકાનમાં લાગેલા સીસીટીવી કેમેરામાં કેદ થઈ ગઈ હતી. સીસીટીવી ફૂટેજમાં ટોળા પૈકી એક વ્યક્તિના હાથમાં હથિયાર જેવી વસ્તુ પણ દેખાતી હોવાનો દાવો કરવામાં આવ્યો છે.

હુમલામાં અમાન અને તેના કાકાને ઈજાઓ પહોંચતા તેમને તાત્કાલિક સારવાર માટે હોસ્પિટલમાં ખસેડવામાં આવ્યા હતા. આ ઘટના બાદ સમગ્ર મામલો કારંજ પોલીસ સ્ટેશન સુધી પહોંચ્યો છે.

પોલીસે આ મામલે ફરિયાદ નોંધીને કાયદેસરની કાર્યવાહી હાથ ધરી છે અને સીસીટીવી ફૂટેજના આધારે આરોપીઓને ઝડપી પાડવાના પ્રયાસો શરૂ કર્યા છે.