કાલુપપુરમાં ગેરકાયદે ફટાકડાની દુકાનો પર AMCની કાર્યવાહી: 30 દુકાનો સીલ

અમદાવાદના કાલુપુરમાં ગેરકાયદે ફટાકડાનું વેચાણ કરતી દુકાનો પર અમદાવાદ મ્યુનિસિપલ કોર્પોરેશન (AMC) દ્વારા મોટી કાર્યવાહી કરવામાં આવી છે. AMCના મધ્ય ઝોન એસ્ટેટ વિભાગે કાલુપુર દરવાજાથી ટાવર સુધીના વિસ્તારમાં સઘન તપાસ હાથ ધરી હતી. આ દરમિયાન, નિયમોનું પાલન ન કરતી કુલ 30 ફટાકડાની દુકાનોને સીલ કરી દેવામાં આવી છે.

AMC દ્વારા આ કાર્યવાહી દરમિયાન એ જાણવા મળ્યું હતું કે અનેક વેપારીઓ જરૂરી પરવાનગીઓ વિના ફટાકડાનું વેચાણ કરી રહ્યા હતા. આ વેપારીઓ પાસે બિલ્ડિંગ યુઝ (BU) પરમિશન, ફાયર NOC, પોલીસ પરમિટ અને એક્સપ્લોઝિવ લાઇસન્સ જેવા આવશ્યક દસ્તાવેજો નહોતા. આ ગેરકાયદે પ્રવૃત્તિને રોકવા માટે AMCએ કડક પગલાં ભર્યા છે.

જે વેપારીઓની દુકાનો સીલ કરવામાં આવી છે, તેમને જરૂરી દસ્તાવેજો રજૂ કરવા માટે ત્રણ દિવસનો સમય આપવામાં આવ્યો છે. જો આ સમયગાળામાં વેપારીઓ કાયદેસરના પુરાવા રજૂ કરવામાં નિષ્ફળ જશે, તો AMC દ્વારા વધુ કડક કાર્યવાહી કરવામાં આવશે તેવી ચીમકી ઉચ્ચારવામાં આવી છે. આ કાર્યવાહીથી ફટાકડાના વેચાણમાં નિયમન લાવવાનો AMCનો પ્રયાસ છે.