અમદાવાદમાં શબવાહિની સેવા હવે મફત, AMC દ્વારા નવી જાહેરાત

અમદાવાદ મ્યુનિસિપલ કોર્પોરેશન (AMC) દ્વારા જાહેર કરવામાં આવેલી નવી જાહેરાત અનુસાર, હવે અંતિમવિધિ માટે મૃતદેહને સ્મશાનગૃહ સુધી પહોંચાડવા માટે શબવાહિનીમાં કોઈ ચાર્જ વસૂલવામાં નહીં આવે. આ પહેલા, શબવાહિની માટે પ્રથમ કલાક માટે ₹50 નો ચાર્જ લેવામાં આવતો હતો, જે હવે સંપૂર્ણપણે બંધ કરવામાં આવ્યો છે.

આ નિર્ણયથી અમદાવાદ શહેર અને AMC હદ વિસ્તારમાં રહેતા તમામ નાગરિકોને શબવાહિની સેવા મફત ઉપલબ્ધ થશે. આ સેવા દર વર્ષે અંદાજે 20 થી 22 હજાર પરિવારોને સીધો લાભ આપશે, જે અંતિમવિધિ દરમિયાન આર્થિક બોજાને ઓછું કરશે.

નાગરિકો હવે શબવાહિની સેવા મેળવવા માટે સીધા કોર્પોરેશનમાં 155303 નંબર પર સંપર્ક કરી શકે છે અથવા ફાયર કંટ્રોલને જાણ કરી શકે છે. આ સેવા 24 કલાક મફત કાર્યરત રહેશે, જેથી લોકોની મુશ્કેલીઓમાં રાહત મળશે.