ભરૂચ: જંબુસર બાયપાસ ચોકડી નજીક ચાની ફ્રેન્ચાઈઝીમાંથી 96 ગ્રામ અફીણ સાથે સંચાલક ઝડપાયો

ભરૂચ શહેરમાંથી અફીણની હેરાફેરી અને વેચાણના કિસ્સાઓ સતત સામે આવી રહ્યા છે. ત્યારે, જંબુસર બાયપાસ ચોકડી નજીક આવેલી એક ચાની ફ્રેન્ચાઈઝીમાં SOG (સ્પેશિયલ ઓપરેશન્સ ગ્રુપ) પોલીસે બાતમીના આધારે દરોડો પાડ્યો હતો.

પોલીસે દરોડા દરમિયાન ચાની ફ્રેન્ચાઈઝીના સંચાલકના રૂમમાંથી 96 ગ્રામ જેટલું અફીણ ઝડપી પાડ્યું હતું. આ ઉપરાંત, પોલીસે ઘટનાસ્થળેથી એક મોબાઈલ ફોન પણ કબજે કર્યો છે. પોલીસે ઝડપાયેલા અફીણ અને મોબાઈલ સહિત કુલ ₹58 હજારનો મુદ્દામાલ જપ્ત કર્યો છે.

SOG પોલીસે ચાની ફ્રેન્ચાઈઝીના સંચાલક સામે નાર્કોટિક્સ ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ હેઠળ ગુનો નોંધી કાયદેસરની કાર્યવાહી હાથ ધરી છે. પોલીસે આ મામલે વધુ તપાસ હાથ ધરી છે કે આ અફીણ ક્યાંથી આવ્યું અને કોને પહોંચાડવાનું હતું.