સુરતમાં 9 મોટા પીપળાના વૃક્ષો કાપ્યા, પર્યાવરણપ્રેમી મહેશ પટેલે ફરિયાદ નોંધાવી

સુરત શહેરના નાકા વિસ્તારમાં જાહેર ફૂટપાથ પર વર્ષો જૂના અને ઓક્સિજન આપતા વિશાળ કદના પીપળાના વૃક્ષોનું આડેધડ નિકંદન કાઢી નાખવામાં આવ્યું હોવાનો ગંભીર આક્ષેપ પર્યાવરણપ્રેમી મહેશ પટેલે કર્યો છે.

મહેશ પટેલે જણાવ્યું કે GPS મેપ મુજબ જે સ્થાનો પર વૃક્ષો હોવા જોઈએ ત્યાંથી નવ જેટલા મોટા વૃક્ષો કાપી નાખવામાં આવ્યા છે.

તેમણે આરોપ લગાવ્યો છે કે MBH-2 બિલ્ડર અને સુરત મહાનગરપાલિકાના ગાર્ડન વિભાગના જવાબદાર કર્મચારી-અધિકારીઓની મિલીભગતને કારણે આ કુદરતી સંપત્તિનો નાશ થઈ રહ્યો છે.

બિલ્ડરોના સ્વાર્થ અને અધિકારીઓની બેદરકારીને લીધે શહેરનું પર્યાવરણ ખતમ થઈ રહ્યું છે. મહેશ પટેલે મ્યુનિસિપલ કમિશનર સમક્ષ તાત્કાલિક તટસ્થ તપાસ હાથ ધરવાની અને પોલીસ ફરિયાદ દાખલ કરવાની માગણી કરી.