સુરત જિલ્લામાં 'નમો લક્ષ્મી' અને 'નમો સરસ્વતી' યોજના હેઠળ 8.79 લાખથી વધુ વિદ્યાર્થીઓને 106 કરોડથી વધુની સહાય

શિક્ષણ એ માત્ર જ્ઞાન મેળવવાનું સાધન નથી, પરંતુ વ્યક્તિના સશક્તિકરણ, આત્મનિર્ભરતા અને રાષ્ટ્રના વિકાસનો મજબૂત પાયો છે. વિદ્યાર્થીઓના સપનાંને સાકાર કરવા માટે યોગ્ય શૈક્ષણિક તકોની સાથે આર્થિક સહયોગ પણ એટલો જ અનિવાર્ય છે. દર વર્ષે 15મી ઓક્ટોબરે ઉજવાતા 'વિશ્વ વિદ્યાર્થી દિવસ' ના અવસરે વિદ્યાર્થીઓના શિક્ષણ, સંશોધન, નવીનતા અને સર્વાંગી વિકાસના મહત્વને વિશેષરૂપે ઉજાગર કરવામાં આવે છે.

આ સંદર્ભમાં, સુરત જિલ્લામાં રાજ્ય સરકારની 'નમો લક્ષ્મી યોજના' અને 'નમો સરસ્વતી વિજ્ઞાન સાધના યોજના' વિદ્યાર્થીઓ માટે આર્થિક પ્રોત્સાહન પૂરી પાડતી આશીર્વાદરૂપ પહેલ સાબિત થઈ રહી છે. આ યોજનાઓ ખાસ કરીને વિદ્યાર્થિનીઓ અને વિજ્ઞાન પ્રવાહના વિદ્યાર્થીઓને આર્થિક રીતે મદદરૂપ થાય છે, જેથી તેઓ ઉચ્ચ શિક્ષણ મેળવી શકે અને પોતાના ભવિષ્યને ઉજ્જવળ બનાવી શકે.

જિલ્લામાં આ બંને યોજનાઓ હેઠળ વર્ષ 2025-26 અને 2026-27 દરમિયાન અત્યાર સુધીમાં કુલ 8,79,309 લાભાર્થીઓને રૂ. 106.06 કરોડથી વધુની માતબર સહાય ચૂકવવામાં આવી છે. આ આર્થિક સહાયથી વિદ્યાર્થીઓમાં અભ્યાસ પ્રત્યેનો ઉત્સાહ બેવડાયો છે અને તેઓ વધુ સારી રીતે પોતાના શૈક્ષણિક લક્ષ્યો પ્રાપ્ત કરવા પ્રેરાયા છે. આ પહેલ શિક્ષણ ક્ષેત્રે રાજ્ય સરકારની પ્રતિબદ્ધતા દર્શાવે છે.